2026-жылдын 27-майында Нарын медициналык колледжинин базасында уюштурулган «Уюшулган жамааттар арасында гельминтоздор менен оорушат: калк арасында алдын алуу иш-чараларын жүргүзүүдө орто медициналык кызматкерлердин ролу» аттуу Эл аралык онлайн-форум болуп өттү.
Иш-чара Yandex Telemost платформасында онлайн форматта уюштурулуп, ага Кыргызстандын жана жакынкы чет өлкөлөрдүн медициналык колледждеринин окутуучулары, студенттери жана медицина тармагынын практик адистери катышты.
Форумдун башкы максаты — уюшулган жамааттарда (мектептерде, бала бакчаларда ж.б.) гельминтоздордун алдын алуу, эрте аныктоо жана ооруну азайтуу багытында орто медициналык кызматкерлердин кесиптик компетенттүүлүгүн жогорулатуу жана эл аралык тажрыйба алмашуу болду. Конференцияда заманбап ыкмаларды киргизүү, сынчыл ой жүгүртүүнү, эффективдүү коммуникацияны жана «4К» моделин (креативдүүлүк, коммуникация, коллаборация, сынчыл ой жүгүртүү) өнүктүрүү маселелери кеңири талкууланды.
Катышуучулар үч негизги сессиянын алкагында нормативдик-укуктук жөнгө салуу, алдын алуу иш-чараларын уюштуруу тажрыйбасы жана орто медкызматкерлердин ролу тууралуу кызыктуу баяндамаларды жасашты.
Иш-чаранын алкагында эксперттик комиссия тарабынан студенттердин илимий-изилдөө иштери жана презентациялары атайын шкала боюнча бааланып, жыйынтыгында төмөнкүдөй орундар ыйгарылды:
🥇 1-орун: Талас медициналык колледжинин жана Түндүк Казакстан жогорку медициналык колледжинин студенттери.
🥈 2-орун: Нарын медициналык колледжинин жана Майлуу-Суу медициналык колледжинин студенттери.
🥉 3-орун: Токмок медициналык колледжинин жана Түндүк Казакстан жогорку медициналык колледжинин студенттери.
Жеңүүчүлөр өздөрүнүн далилдүү медицинага негизделген иштери, санариптик чечимдери жана калк арасында санитардык-агартуу иштерин жүргүзүү боюнча креативдүү долбоорлору менен өзгөчөлөнө алышты.
Бул эл аралык иш-чаранын жогорку деңгээлде өтүшүнө Нарын медициналык колледжинин директору, уюштуруу комитети төрагасы Т.Б. Арпачиева жана форумдун модератору — эпидемиолог, НМКнын билим берүү сапаты бөлүмүнүн методисти А.Т. Орозова чоң салым кошушту.
Форумдун жыйынтыгы боюнча катышуучуларга электрондук сертификаттар тапшырылып, сунушталган мыкты илимий иштер, алгоритмдер жана калкка арналган эстеткичтер медициналык колледждин расмий сайтында (nmk.org.kg) жайгаштырылат.
Бул иш-чара келечектеги медицина адистеринин илимий потенциалын арттырууда жана калктын ден соолугун коргоодо маанилүү кадам болуп калмакчы.
